Կաթկթած գոյներ | Ալիսիա Իշխանեան

Հալածող կապոյտը,
Պատերուն փսփսուքը,
Հովին շշուկը վարագոյրի ճեղքերէն,
Կաթիլներուն բախումը միակ գաւաթին:
Մէկ անձին աղմուկը:

Հալածող մոխրագոյնը,
Անկողնին պաղ կողմը,
Սրճեփին ձայնաւոր մշուշը,
Երազներուն հոսանքը դէպի կոյուղին:
Մէկ անձին պայքարը:

Հալածող դեղինը,
Գիրքի էջերու մաշկը միայն:
Մէկ անձին ուրախութիւնը:

Հալածող սեւը,
Ոտնահետքերը ճերմակ գորգին,
Կարմիր, կարմիր հագուստը կախուած պահարանէն,
Պարապութիւն մը:

Մէկ անձին մենութիւնը:

Ալիսիա Իշխանեան
-Պէյրութ