ԻՆՉՊԷՍ ՊԷՏՔ Է ՎԱՐՈՒԻՍ ՈՐ ԿԱՆՈՆԱՒՈՐ ԿԻՆ ԴԱՌՆԱՍ | ԳԷՈՐԳ ԼԱԶԱՐԵԱՆ
«Քայլ առաջին. մարմինդ գեղեցկացո՛ւր»
Աղջիկը տեղէն ելաւ, վրայի պլուզը հանեց բոլորին առջեւ եւ մնաց միայն կրծկալով: Անուշիկ աղջիկ մը՝ սեւ կարճ մազերով, սեւ աչքերով եւ հիանալի մեծ կուրծքերով: Փակցնելիք tape մը ձեռքը առաւ եւ սկսաւ փորին շուրջ դարձնել: Քիչ քիչ կը նիհարնար կարծես: Կեցուց իր գործունէութիւնը, երբ գոհ մնաց:
«Քայլ երկրորդ. սորվի՛ր ճիշդ քալելու ձեւը»
Աղջիկը բարձր կրունկներով կօշիկները առաւ քովէն, հագաւ եւ դժուարութեամբ քալելու սկսաւ, քիչ քիչ յառաջանալով: Քիչ մըն ալ եթէ քալէր, վստահաբար վար պիտի իյնար:
«Քայլ երրորդ. երեսդ ներկէ՛»
Աղջիկը շրթունքը կարմիր ներկեց եւ աչքերը սեւ գոյնով շրջագծեց:
«Քայլ չորրորդ. խմիչքդ ձեռքդ ա՛ռ եւ սպասէ՝ ուզած տղադ մօտենայ քեզի»
Քիչ մը սպասեց որ բոլորը լաւ մը դիտեն զինք: Ետքը գնաց փոխուելու: Կօշիկները հանեց, երեսը մաքրեց եւ նոր պլուզ մը հագաւ, որուն վրայ գրուած էր՝
«You don't hate Mondays, you hate capitalism»:
Գէորգ Լազարեան
(Յունաստան)
Comments
Post a Comment